第2屆桐花文學獎新詩類佳作【歷史會記錄下這一日】──記1988.12.28.還我母語運動

該年,桐子打到當結
拋拋滾个理想,嗶嗶跳个子房
在樹頭搖搖蕩蕩
既經忍毋核了,這壓抑个重量
像千萬隻無形个手拉等佢,去敲
去敲醒大地个心臟
讀書人離開辦公桌,耕田人離開田坵,婦人家拂忒鑊鏟
成萬个客家人頭搨標語、手擛旗仔
擎等揞嘴漯仔个國父遺像,去喊、去爭取
還文化个種子、還語言个土地
還!還!還客家聲
每一步,震動大地个脈搏
每一聲,喊醒自家个精神
今晡日,佢兜愛用意志征服城市个耳公
用勇氣鬆開歷史个絡索
無著!佢兜愛聲,佢兜愛出聲
桐子叭叭跌,戰鼓樣仔響到天頂
目珠瞋瞋看等目珠,靈魂瞋瞋看等靈魂
軟弱剝忒、自卑剝忒、族群个界線剝忒
原始个力量跈手佢衝出賁賁个硬殼
用力、用力、煞猛用力
前進、前進、煞猛前進
幼嫩个新芽有巨大的任務完成祖宗的希望
企穩腳下个一片地,網羅頭那頂个一片光
自由个心靈會指引生長个方向

最後更新日期:2013-08-02