第3屆桐花文學獎新詩類首獎【阿姆个飯包】

𠊎帶著阿姆做个飯包,轉到小學教室
𠊎看著自己个桐花布仔飯包,放在蒸飯架第二層;擠在𠊎个右側,係阿哥个巨無霸;范老弟个鐵盒,坐在𠊎个右側;羅娣妹永遠炊在最下層,先生說她个飯包掉了一隻耳公,其實係冇人要坐她脣口
𠊎个小學同學,排排坐在蒸飯架上交朋友

𠊎掀開阿姆做个飯包,埋首在當晝个細探險
𠊎吹奏綠蔥个魔笛;𠊎推開白斬雞个蠻橫;𠊎打敗一肚笥壞卵个苦瓜;𠊎畏羞看著酸菜个長髮戇笑;𠊎面對五百粒糙米練習升旗个演講

𠊎掀開阿姆做个飯包,行入同學个家門
綱榮半掩蓋仔个飯包,比佢个橡膠農鞋還愛卑微;副班長个梅菜奢鼻个講,多食爌肉正會伶俐;鍾家週六添新丁,今晡日又食紅粄;二月就冇阿姆个彭仔,他个飯包係一張茄仔色个五十元紙票

𠊎帶著阿姆做个飯包,留在中午个辦公室
𠊎掀開阿姆做个飯包,坐上昨暗晡个晚餐圓桌;𠊎食著晚餐个糍粑,走在阿爸个童年;𠊎食著晚餐个吊菜仔,嘗到阿婆个藥仔;𠊎食著沈默个晚餐,愐像阿姆个一生人

食著阿姆做个飯包,𠊎噭眵起來
𠊎發現炕肉炆到淡了點;𠊎發現覆菜醃到烏了點;𠊎發現豬腸攞到酸了點
𠊎不明白係菜壞了,還係𠊎个心壞了;𠊎不明白係阿姆變了,還係孩兒變了;𠊎不明白係昨晡日忒遠,還係今晡日忒近

𠊎弇上阿姆做个飯包,愐起她的舌嫲,在𠊎會講話後老了;愐起她个目珠,在𠊎會見識後老了;愐起她个手臂,在𠊎會撰寫後老了

𠊎帶著阿姆做个飯包,回轉細漢時个屋家
𠊎看見,堆滿滿食材个灶頭,阿姆剝擇豆莢个粗粗手巴掌
𠊎聽到,食光光个飯篼仔內,湯匙歡喜歸屋下个聲音

最後更新日期:2013-08-05