第3屆桐花文學獎散文類佳作【油桐樹下个掌牛哥仔】

起始

  遠遠看仔去對面山个龍峎頂,樹仔生來無幾高,怕係風爐缺个關係,這兜樹仔長年透天就係恁仰形,崩崗唇个石壁項綻出一頭榕樹,該顛倒生到當旺,還細个時節毋知哪來个膽,爬到榕樹項抓蟬仔搞,擎頭一看係見毋着天,生命力量係分大家道嘆定定,逐年到四、五月山排个草竇肚,斷烏邊會有緊眨仔眨个光無停,原來就係火焰蟲,這兜火焰蟲怕有幾下十隻,𠊎兜儕忍毋核想愛用兩隻手去揞,總係揞毋着,火焰蟲當像摎𠊎兜儕講:「來唉!來唉!」

  五十零年前,𠊎出世在深山林內个茅寮,該兜位係單家園屋,離吾屋家盡近係對面山个阿叔公屋家,係講想愛過家尞行路愛一兩十分鐘正會到,還記得該央時,屋面前天蒔坪唇个崎仔頭,毋知那央時起始,生仔幾下頭个油桐樹,該兜油桐樹毋係講盡多,還算毋得係一隻樹園,毋過熱天時節,這恁多頭油桐樹葉仔生到榮榮,日頭曬毋到半息,係在樹下尞涼,有涼風略略仔吹過來,樹頂又有畫眉仔㧯蟬仔在該噭無停,這種大自然个音樂,十儕就怕有九儕會琢目睡;𠊎該下怕正係六、七歲樣仔,擎燙耙仔毋贏,還係愛𢯭手禾埕項曬穀仔去倒行仔,有一擺榖行倒散仔,歸身大汗就恁樣形,就在油桐樹樹下个石凳仔項琢目睡,歸晝邊無翻榖行,連落雨毛仔來就毋知好收穀,續來分阿姆罵!這時該恁多頭油桐樹尾搖無停,盡像㧯𠊎會失禮講:「恁敗勢,就係𠊎害你分人罵!」分𠊎試到過意毋去。

祖孫情

  屋腳下个田坵肚𧊅仔,一到春頭暗晡頭特別大聲噭無停,同你講寒天過忒新个一年來唉!大家就愛開始煞猛做事毋好推懶,今年正會有好收成。    該時節阿婆大約五、六十歲仔,目珠花花愛攣衫褲个時節,會喊𠊎𢯭手桊針線,佢抑會來油桐樹下尋𠊎,𠊎會㧯阿婆豺奶,喊阿婆講古分𠊎聽,這下阿婆大體會講兜三國演義、薛仁貴征東、樊梨花移山倒海、臭頭皇帝洪武君無就包公審案,阿婆除了劇情做得從頭背到尾,全部劇情就熟絡,毋會漏忒半息,成下阿婆講到當鬧棚時節,還會用厥無盡靈活个手腳在該比比畫畫,害𠊎看到好笑个所在成時會㖸死,聽到劇情當淒涼个時節目汁搣會跌下來,有好人分壞人害到半生死,𠊎會代佢煩勞代佢愁,吂知這係多愁仔,因為係做戲毋係正經个;𠊎識問阿婆佢對這兜劇情樣會恁記得,佢講該時節吂有電視,全部係在收音機肚項廣播電台做採茶戲聽來,聽得多遍過後自然就記得起來,雖然阿婆無讀麼个書,還係記得到恁多个戲劇,實在分人料想毋着‧阿婆除了會講恁多古外,有時在縈草結、剁豬菜、刷番薯籤个時節,佢還會教𠊎唱歌仔,阿婆教个歌仔大體聽無麼个有,原來阿婆係唱日本歌,頭擺佢讀日本書,故所以佢會唱个抑係日本歌,盡打喪𠊎正學到兩句仔定定;阿婆當惜𠊎兜孫仔、孫女,有好料好食,總係毋盼得食,愛讓𠊎兜食,係講𠊎兜係辭手,佢就會講𠊎恁老仔,食較多搣毋會大,下二擺死忒僅可肥田,阿爸在這下會講:「阿婆係老人三歲子,有口無心」還過「爺娘想子長江水,子想爺娘擔竿長‧」

油桐樹下搞月光棋

  天蒔坪無曬穀係泥禾埕,有泥粉个所在看得到沙漏形窟仔,毋使講定着係砂鑽(蟻蝨),囥在該位手指頭扒開就會走出來,較硬个地泥抑有孔仔,逐擺食涼水个空盎仔,裝淰淰水灌在孔仔項,土狗仔就會趖在盎仔肚項。  油桐樹下除了熱天好尞涼之外,抑係𠊎㧯叔伯兄弟姊妹共下搞混家啦飯个好所在,識有一擺搞討新娘𠊎詐意做新娘公,叔伯老妹做新娘,阿姊假做媒人,叔伯阿哥做且郎,新娘頭那頂高插等在油桐樹頭下摘个一蕊打碗花(夜合花),心肝頭前抑結等一蕊紅紅个雞公髻花,看起來時在還靚娜!𠊎牽等新娘愛轉屋个時節,新娘一下無行好勢,差一息就跌倒,𠊎煞煞㧯新娘揇起來,正看到新娘个兩隻面頰卵紅紅,驚見笑抑驚見笑仔,該央時毋知頭天,這兜全係大人个事腹,到較大知人我仔正知,細倈仔做毋得儘採扐人个細妹仔;成時家啦飯搞懶仔,就換搞囥人尋,有一擺𠊎做鬼愛負責去尋人,因為目珠揞等阿哥囥在油桐樹背,𠊎話着油桐樹係一儕人囥在該,放勢揇仔去正知係油桐樹,大家笑到會㖸死,這時節叔伯老弟㧯阿姊囥在油桐樹項个椏叉,害𠊎那位就尋無着;阿爸在油桐樹个樹椏項,安兩條大索,一垤枋仔兩頭鑽兩隻空,索仔䌈等空仔做晃槓分𠊎兜吊,老弟識無扳好勢嗄跌下來,确着頭那,額頭起一隻瘻,噭到噦噦滾,滿那就聽得着,阿姊遽遽走轉屋家去拿萬金油,㧯老弟个額頭搽搽仔,講抑奇怪這萬金油毋知麼个做个,搽落去一下涼涼,老弟就毋會過噭仔,這瘻搣聶下去,好得萬金油恁好用,係無等到阿姆轉來,𠊎兜又怕愛食竹修粄正做得!當然搞家啦飯摎搞覓摸目,無恁多人个時節搞毋得,𠊎兜跳樹奶索仔,毋就跳格這兜全部會有來無去,搞懶仔就會湊等共下行月光棋,棋子用崩崗唇生該頭狡孱樹子做个,無湊雙个人將狡孱樹子蒂頭削忒,插一枝番仔火筋落去,用大手指公㧯中指擎等番仔火筋,狡孱樹子尖頭向地泥,做極樂仔㨎仔去,會轉當轂到,比賽看麼儕轉較久着,逐擺𠊎兜儕在油桐樹下搞个時節,屋家該條花花喇狗就會走過來插一腳,毋就在唇頭摻等,尾緊拂嘴緊吠,實在當生趣!故所以講狗仔係兜盡好个伴仔,一息仔就毋會差!

桐樹下个掌牛哥仔

  牛仔係耕田人个好朋友,犁田、耙田、打碌碡無佢做毋來;牛仔毋單淨摎人𢯭手耕田,還將壽年減分人類來添福壽,實在係有情有義。  該央時屋家有耕田,阿爸有牽一條赤牛來蓄,三不二時就愛𠊎兜牽牛去山頂食草,逐擺在竹頭下過,熱天時節就會看着竹筍蛄,苦楝樹項有山牛牯,飛來飛去盡後背飛到正綻个竹筍項,在該位食竹筍,𠊎兜就會惦惦仔在後背撮仔去,捉一隻轉去屋家用阿姊擎針用个線,一頭䌈等竹筍蛄个鼻公,另外一頭手上拿等,放佢飛上飛下,搞懶仔就解忒放佢走;有成時熱天過忒,換去苦楝樹、刺桐樹項抓山牛牯來搞,在山牛牯个兩隻角,儘採䌈等一隻角,搣共樣當會飛過來飛過去,記得有一擺下晝頭搞到反忒,屋家該條牛分佢打㪐忒去,毋知走到那位去,害𠊎兜尋到人食飽夜,就還尋無?心肝肚緊想,壞蹄唉!這擺係轉去定着有竹修粄好食,

油桐樹个一生

  好得牛仔个蛤蟆胲有結等玲瑯仔,遠遠就聽着厥个聲,原來佢早就走轉到油桐樹下。   除了屋唇該恁多頭油桐樹,對面山阿叔公个屋背,還過就近个山項又搣盡多,逐年油桐樹到初秋个時節,會打當大粒个油桐樹子,搣開始會落葉,等到葉仔落到差毋多个時節,油桐樹子抑會㪐蒂跌到地泥下來,這時節兜就愛去㧯油桐樹子,拈起來屋家个簷頭下堆,過無幾多日就會有做生理个人來收去賣,聽講愛收去焗桐油,桐油係無係吾兜做兵時節大家拿來捽皮帶頭用个,這𠊎就毋知仔?賣油桐樹子个錢做得分屋家相添好用,成下阿姆會將零星去買零嗒分𠊎兜食,𠊎兜就會還較煞猛去拈油桐樹子‧到仔冬下頭个時節油桐樹會跌到無半皮葉,樹尾項輒常看着阿啾箭在該唱歌,眺睍掌鷂婆,鷂婆就毋敢抓屋家个雞子、鴨子就毋會毋在忒!年過仔忒春頭來仔,油桐樹唇頭有一頭苦楝樹,盡早看佢開花綻筍,苦楝樹花係淡淡吊菜色,遠遠行仔過鼻到略略清香,跈等油桐樹抑開始生嫩葉,到仔近近仔五月初該央時,毋單只屋唇該恁多頭油桐樹定定,對面山就近該兜山排項,全部看得着開到白雪雪个油桐花,遠遠看仔去就像寒天落雪共樣,好得大家這下全部就着無袖衫,係無時正經會話着係寒天,這兜油桐花就怕係愛打油桐樹子个花,故所以佢㧯別種樹仔共樣,先開花後結子‧

樹仔搣有情

    有一年發大風搓,屋家个茅寮屋頂,分大風掀起來,屋唇个恁多頭油桐樹个樹椏,當多分佢拗斷忒,害𠊎兜該年熱天就無油桐樹下好尞涼;阿爸搣㧯𠊎兜講,油桐樹係較脆材質个樹種,做樵燒較無奈火,但係佢當好燒,抑當會遰火燒,故所頭擺人拿來做捽仔火筋,後來人用佢來合枋仔,有一駁仔當多貌頭來山項,貌油桐樹請人用鋸仔剪來做材,正用鐵牛載下山,用大台拖啦牯疊好勢載去工廠做三合枋,𠊎正知原來靚靚个合枋就恁樣來仔‧轉首第二年大約𠊎小學五、六年生,阿爸在庄下較街路項,買一垤地自家起樓仔屋,無幾久起好,就按算徙去歇,毋過街路項車仔來來去去較多,屋家蓄該狗仔、貓仔、雞仔、鴨仔,全部做毋得跈去,只好將佢兜留在老屋,狗仔㧯佢綯等在油桐樹下,逐擺轉老屋遠遠聽到腳步聲,佢就盡暢!看到𠊎兜還較歡喜,揮尾揮無停,兩隻腳摻等伸到長長,但係等到𠊎兜愛走該下,佢又像人目珠含等目汁,分人看着當毋盼得,毋過這搣無奈何;分𠊎兜盡痛心个係這條狗仔,過無幾多隻月續來死忒,歸屋家人盡傷心,毋知係狗仔無人好做伴,鬱卒來死,抑係三餐食無勻來枵死,阿爸講:「萬物就有生命,做得共下个時節,就算係有緣,愛曉得把握機會!」本成愛講狗仔死老放在水圳,分大水打走;大家在心肝肚盡毋盼得該下,決定將佢埋在油桐樹下,後來逐擺轉去老屋,就先去看看埋狗仔所在‧生命有限透,毋好茫茫渺渺過一生,老來正有好分後撐仔尊敬‧

收尾

   徙屋過後幾年,阿婆毋知係歇毋慣街路項,較愛歇在山項,可能空氣較好,日日聽得到鳥仔聲,看得到毋知名仔个花,朝晨暗晡做得去菜園種這種該,來到這位漸漸仔身體就無恁砸磳,風邪感冒免不了,還擔到糖尿同高血壓,抑緊來緊發福,阿爸雖然有帶佢醫院,分醫生看拿藥仔食,單淨控制無法度斷根,可能阿婆抑知自家伸無幾久定定,將自家个後事交代好勢,過忒幾下隻月,阿婆正經就放忒𠊎兜去另外个世界;原來阿婆交代係愛將佢自家埋在老屋个油桐樹下,阿爸雖然毋盼得,還係照厥意思去做,阿婆个風水就做在頭擺𠊎兜吊晃槓該頭油桐樹下,過仔三年阿爸㧯阿婆撿好骨,等日子尋位所,將寄崖放在該位好久,盡背尾塚埔尋有位仔,正埋在塚埔項,寄崖該一站仔,轉去老屋會先去油桐樹下㧯阿婆講話,成下會唱客家歌分阿婆聽,毋過毋係日本歌,驚怕阿婆聽毋識‧

   這下係還有轉去老屋,該恁多頭油桐樹共樣生到當高,逐年共樣開花打子,細細个童年就留存到腦海肚項定定,花啦狗㧯阿婆毋會倒轉來,無定佢兜在天頂項逐日看等,𠊎兜儕有乖有煞猛無?去到學校搞吊晃槓,晃過來想到將來个路愛樣般行下去,晃過去想到油桐樹下个童年,會敨一下大氣,時間過忒真遽,這下𠊎抑做人爺娘,係較好命兜還會做阿公、阿婆‧

最後更新日期:2013-08-05