第4屆桐花文學獎客語類小品文組首獎【阿姆个一日】

雞吂啼來狗吂吠,遽遽就䟘床。
先來㓾雞仔,打算㓾兩隻。一隻用煠,煠好後,做得用來作牲儀,拜過神明後,再來剁雞盤。大賴仔講:「想到幼皮嫩肉个雞盤,來搵淰黃淰黃个桔醬,就會流口涎。」佢歇桃園,同朋友鬥股開工廠,逐日就像打極樂樣仔,捩捩轉!自家蓄个雞仔,盡安全又營養,食飯該下,愛多夾幾垤仔分佢;佢從小乜當好食雞胗,𠊎另外留著,等佢一入門,就愛先拿分佢食。煠雞个肥湯堵堵好拿來煮覆菜湯,又甘又酸个味緒,係大心臼相當謳腦个客家菜(佢係外省人)。
大孫仔今年愛讀國中,生來瘦夾夾仔,骨頭就拗欸斷,故所,另外一隻毋煠个雞仔,愛來摎羊奶頭、山葡萄藤共下燉分佢食,聽講食了後,體格會較打粗。
朝晨還愛來䌈粽仔。調尾仔好食𠊎包欸个鹹粽,講麼个該種有狗薑葉味緒个粽仔,就算係米其林个飯店乜做毋出來个,佢到山東省大連市食頭路,輒輒發夢,夢到𠊎包个鹹粽,這擺轉來,分佢好過癮;小孫女好食鹼粽,愛多䌈幾擐个,分佢帶上去台北,留到身邊慢慢个食。
半晝邊仔,𠊎擐等牲儀來到恩主宮。孫仔、孫女從細仔認恩主公做義父爺,屋下有㓾雞仔,較澎湃,愛先來敬神,拜託神明保護孫仔、孫女身體康健。
敬神轉來也過晝耶,煞手來煮青草茶,炆筍乾。大大細細三餐旦旦在外背食,毋知食忒幾多欸个塑化劑,毒澱粉到肚笥項;仙草同白靈芝草共下煮出來个湯汁,其排毒个效果一等好,今晡日,特別煲歸大鑊仔,等佢兜轉來,每一儕人愛同𠊎啉歸碗公仔正好喔!
炆筍乾盡耗時間,毋過,𠊎特體歡喜。見擺係有炆筍乾个時節,吾个小孫仔,一入門,就大嘛咕聲適該喊:「這就係阿婆个味緒,愛轉來老屋,正鼻得到个。」你看哪!五歲仔定定,就講得出該種恁得人惜个話。
係喲,險險毋記得哩,小孫女逐擺月事來个該下,肚笥痛著到眠床項環來環去,下晝拈有三粒屋下个雞仔正生个卵,同艾草共下炒卵酒分佢食,食了行血,固子宮,保證毋會肚仔痛。
炒米粉个香料、炒肉个蔥白、炒大腸个薑絲……今晡暗晡食夜个菜料全部就準備好了,等賴仔、心臼、孫仔、孫女轉屋,黏食落鑊,油鍋緊板,大家就有澎湃好食哩。
歸家人仔轉來共下食飯,異歡喜,毋過,後生人有渠頭路要做,點火樣仔,碗筷一放,各儕就轉各儕个屋;𠊎撿揪撿好,身腳洗好,電視底肚傳來母親節个歌曲,係唷,今晡日係母親節,無閒歸日哩,現下正感覺肚枵,切一垤細人仔買轉來个雞卵糕來食,卵糕頂項个奇異果恁酸,毋過,雞卵糕係甜个,甜甜酸酸親像𠊎現下个心情。
最後更新日期:2015-08-14