第4屆桐花文學獎客語類小品文組優等獎【山个愁慮】

𠊎係一座山,住在苗栗介南庄。

這位介景緻盡靚,白雲係𠊎介帽仔,綠樹係𠊎介頭顱毛,清風係𠊎唱出來介歌仔。

幾十萬年以來,𠊎都惦惦坐佇這位,每日看等日頭出山又看等日頭落山,每只月看等月光變圓了又看等月光缺角了,看等桐花像雪恁白、看等楓葉像火恁紅,聽貓頭鵰咕咕咕在該打嘴鼓,看竹雞仔在竹林肚走來走去、梅花鹿在細坑唇飲水。也看到一兜人有時會佇𠊎介身上走動。

    雖然有時也會發風颱、做大水、河灞亂竄。毋過風颱過忒、大水過後,黏皮又會出大日頭,又會有好天時。有時也會聶爧響雷公、地動天搖,毋過咬等牙根過了後,黏皮又會回復平靜,日仔還係恁樣介快樂自由。

    有一日,毋知奈位走來一兜人,佇東片行來行去,佇西片看上看下,還拿出一樣怪東西比來比去。講麼介這位介風水當好,左片係青龍,右片係白虎,頭前介中央還有一張大案桌,面向台灣海峽,腳下還有一片開洋介平台,在這位起祖塔做得福蔭後代子孫。沒幾久,就駛來一台怪手車,轟隆轟隆吵鬧幾下只月,在𠊎介身上開出一條路,大興土木起了一座祖塔。該條路實在還醜哦,彎彎糾糾當像老阿婆介纏腳布。就恁樣形,每年介清明節,就會有當多當多人,到這位來燒香、拜拜、打紙炮仔、淠檳榔汁,還過滿奈兒屙尿屙屎。吵到𠊎毋得安寧。好得過了清明以後,該兜人就離開了。

    又過幾下年介一日,毋知仰般又走來一大群人,佇東片行來行去,佇西片看上看下,還拿出翕相機翕這翕該。講麼介這位介風景好,有盡靚介高山,有淨俐介坑水,還有當多當多像天頂星仔飛下來遛介火焰蟲,若係起民宿會招來盡多人客、發展觀光事業,做得賺盡多錢。

沒幾久,又駛來當多怪手車,在𠊎身上開出幾十條路,轟隆轟隆吵鬧幾下年,滿山滿奈兒都起屋來做民宿。該兜民宿實在還醜哦,一塊一塊就像在𠊎介身上貼了盡多膏藥共樣,分人看了就受氣。就恁樣形,一到遛日,山頂就變到像吵鬧介菜市場,車仔尖車仔駛毋過去,人尖人擠來擠去,帶等歸家大細佇這位吃東西飲涼水快樂搞遛,還佇樹林肚焙肉,擲到滿奈兒都係寶特瓶、塑膠袋仔,還有臭氣噴天介水果皮摎垃圾。就恁樣形,貓頭鵰毋見了,竹雞仔毋見了、梅花鹿毋見了,快樂自由介日仔也毋見了。

種種介改變都分𠊎感覺到非常介著驚,分𠊎心肝肚有盡多愁慮……。敢講,敢講𠊎介景緻恁靚也有毋著嗎?

這下𠊎長透都會愐起頭擺無煩無惱介日仔,愐起頭擺快樂自由介生活。你這兜人仰會恁無天良?有一日分𠊎發譴介時節,你兜就該死了。

最後更新日期:2015-08-14