第4屆桐花文學獎客語類小品文組佳作【撈起海肚个溫度】

年下仔寒流乍乍到(註1),海面空氣強強會結凍,好得冷風吹毋入用電暖器圍起來个都市,寒熱針正能維持春天个度數。毋過,冷風利過刀,本本向南吹入無偎毋靠个桃園海脣,在這種打狗就毋出門个半夜, 嗄䟓䟓走到觀音工業區大崛溪个出海口。
氣象局个潮汐報告,這下堵好係半夜个滿潮,溫度罅冷,在這河海交會處會餳來一尾一尾看毋真切个希望--又安到鰻線个鰻魚苗,故所乜餳來一群討生活个鄉親來到這尋機會。鰻線一尾十個銀或者更多,價數看數量決定。鰻魚係「降河性洄游魚類」,摎鮭魚倒反,先在淡水河壩肚成長,到成熟愛打卵个成魚正轉到大海,魚仔仔(註2)又在寒流天漲潮時節泅轉河灞。
漲潮个海水在腳脣一寸一寸淰過來,浸過腳趾、浸過腳盤, 在冷過霜个海風中緊顫緊退。斡頭向海浪聲个方向看過去,看毋著半夜个海,淨看等一盞盞細細蕊个頭燈像火焰蟲,頭燈單淨照光腳下一呎近个海水,看起來就像山壢肚个一窟山溪水,毋過,「易漲易退山溪水;易反易覆小人心」,一窟山溪水還驚會打走一片山排,一片恁大片个海,係發起譴來,毋知會仰般?在看毋著前途个半夜海浪聲中,這兜人算來係毋知驚?抑係無閒驚?緊想緊痛。
佢兜著等連身个水衣褲,恬恬緊看自家个魚撈仔入水肚、出水面,頭燈下又認真緊看,鰻線當細尾,像成寸長个線節,故所正安到鰻線,又白色半晟光(註3),一下無認真就會打爽放鰻線轉大海。大家頭傾傾仔無麼个講話,成下仔會有人出聲「一尾!」接下來脣口就會有幾下聲「唉~」
這海肚撈鰻線个鄉親,係民國四十九年為著發展工業需要水力發電,犧牲自家个家園分人起石門水庫該下,徙到這觀音海脣移民新村个第二代第三代,因爭海脣个海沙田種作難、生活艱苦,山上人嗄愛落海撈鰻線補貼生活。 大聲問一位阿伯,暗晡夜撈幾多尾? 摎佢 算,新聞報導這下價數一尾百七,係有十尾,就比日時頭上班還好加多。阿伯面向陸地个故鄉方向無正面回答,顛倒譴愷愷仔將撈仔用力往岸上一豁就跋上岸,又直直向等看鬧熱个 行過來,再伸出雙手用壓過海浪聲个聲頦摎 講:「汝係教授無?來握手, 已經連三暗晡打宕窿(註4)矣,祈求若手能帶分 好運。」
包尾,在滿係工業區廢水个岸脣,佢歡歡喜喜个拿等三暗晡來个第一尾鰻線展寶分 歙相,毋過,這時節既經開始退潮,就愛收工矣。阿伯講:「 兜都係大戆槌,這種天時毋到屋下糾被骨,走來這浸冷霜。」
該阿伯偷偷捽忒个目汁,十二月北風都看著,毋過,開等電暖氣行入夢鄉个人敢知,半夜還有人在冷過霜个海上撈溫度。

 
註解:
1.乍乍到(zagˋzagˋdo) 接二連三到來
2.魚仔仔(ngˇzaiˊeˋ ) 剛出生的小魚
3.半晟光(cangˇ) 半透明
4打宕窿(daˋtong lungˇ) 錯過
最後更新日期:2015-08-14