第4屆桐花文學獎客語類小品文組佳作【賣病】

病做得賣沒?假使做得,𠊎愛尋買主 。
阿婆在醫院身體當弱,佢交代阿爸去賣病。阿爸請𠊎準備一張紅紙,一支毛筆,愛𠊎黏時送到醫院去。紙摎筆,阿爸敢係要煮字做藥仔?如同畫符燒灰泡滾水醫病,也係像寫賣屋个廣告共樣,想愛尋買主。
一路裡來,阿婆從來毋識看先生。肚屎一痛,佢就會去摘娘花心嚼綿落肚,就像一條牛食草;堵到刀傷血光,馬上走去田脣摘蕾公莖葉,放落嘴肚嚼綿綿以後膏到傷口,止血當有效。 六月日頭烈烈,一下熱到,一支扁梳,一碗清水,遽板个手工刑法,在自家背囊刮出兩路紅跡。冷著時節,燒湯落肚,燒水抹身。為到省錢,佢從來毋看先生,不管仰般,佢一切安然。
毋過,阿婆這關難過咧!歲數大,肺癌,身體無像頭擺,這病也超過佢自療个能力,沒奈何分阿爸送到醫院去。𠊎拿了一張五公分大个紅紙,送到醫院後,阿爸跍等寫「出賣兩片葉」五隻字在紅紙頂,愛𠊎佬這張字,貼在醫院个壁壢角。對這種沒常識个做法,我仰般都想毋透。噭抑笑,不知愛選那樣好。
「該係老頭擺客家莊个風俗啊 !」 爸爸看𠊎發啄呆,摎𠊎講:「民國三十初年,生活艱苦,發病仔沒錢看先生,就會賣病。目珠紅紅腫腫就出賣火種,一旦冷著發燒就出賣重傷風,皮膚發了風丹〈過敏性風濕疹子〉就出賣風丹。」照爸爸个講法,賣病係有儀式个,也有愛賣个對象,阿爸講佢有一擺目珠發針眼,阿婆請人用毛筆寫「出賣火種」个字樣在紅紙頂,佢行到十公里外个燒磚場,貼在磚窯項,因為磚窯需要烈火燒磚。總講,病毋會賣分人來食。
可能係惜花連盆!阿婆个「醫術」在𠊎个身體也留影留跡。該像魚販仔刮魚鱗樣个刮痧手法,力道早就透到𠊎心肝肚。十歲該年,我發了豬頭皮,面頰卵腫到像一頭豬公,阿婆愛阿爸佇𠊎面頰卵最紅腫个位所,畫一隻圓圈仔,中央寫一隻「虎」字。一講豬驚虎 ,一講虎食豬。該年,阿婆成功摎𠊎个豬頭皮,賣分老虎大食一餐!
對阿婆个病,阿爸當毋盼得。嗽毋停,痰多,每一聲都像放紙炮,每一口痰都可能摎阿婆嘔出家門。在無結煞个時節,爸爸決定用阿婆最相信个方法,賣病。X光片下阿婆个兩片肺,如在殘風中飄搖个敗葉,該係阿婆痛苦个源頭,賣兩片葉,係佢摎阿婆參詳後个決定。
想通了!摎阿爸講,該就貼佇菜園。菜蟲食菜葉,就將該兩片葉賣分菜
蟲!冬下頭,歸園个大菜,阿婆戴院个時節,菜蟲圍揪揪偷食。𠊎摎爸爸手寫个紅字條,貼在一頭菜葉頂。第二日天光,去菜園後發現紅紙毋見忒咧,滿那位尋毋到。去醫院看阿婆,爸爸摎𠊎講,阿婆昨晚晡無病無痛 ,一夜好睡。
最後更新日期:2015-08-14