第4屆桐花文學獎客語類小品文組佳作【筍乾】

「飯煮好哩,遽遽來添飯!」阿姆 喊。
聽著个 第一時間, 𠊎同老弟相爭走入灶下。
看著桌頂个菜,有爌肉、白菜、客家小炒、醃瓜仔還有覆菜湯,四菜一湯!
老弟講佢攪爌肉味就好,看著桌頂該鑊爌肉,裡背無放筍乾,正想起,屋下這下無筍乾好食哩…
「阿璿下晝放學轉來,同阿婆共下切竹筍好無?阿公這下要去山項剁竹筍轉來…」
還細个時節,盡好同阿公阿婆在屋下寮,記得有一年,阿公剁當多竹筍轉來屋下,阿婆想做筍乾來食,多个還做得拿來賣,有買過个人,隔年一定還會轉來尋!
愛恁般做筍乾?阿婆教𠊎…
第一步拔竹筍,一刀在竹筍尖尾項剁落去,扭幾下圈,出力從竹筍尾扯著頭項,正摎伸个竹筍殼拔落來,阿婆講這係拔竹筍盡遽个方法。
第二步切竹筍,做毋得忒薄,會食無肉,乜做毋得忒賁,會無好食,竹筍頭个肉較硬,切較薄,尾較嫩,切較賁,無矺竹筍个時節,尾項會無肉,記得該央時,屋下个盆仔、水桶仔、鑊仔,通體就拿出來用。
第三步浸水煮滾,切好个竹筍拿來浸一兩點鐘个水,正來煮滾。
第四步鹽生矺石頭,摎煮好个竹筍水倒淨,倒鹽落去攪,等半日無就係一暗晡,竹筍出水出著差毋多過後,放布袋項,大石頭矺一兩日就好哩!
放學變成𠊎盡歡喜个時節,同阿婆在廳下切竹筍,還有聽阿婆講古,逐日就會希望切竹筍个時間遽遽來!
該央時个𠊎,正讀國小三、四年級,感覺做筍乾係當好搞个事情,乜感覺𠊎大漢哩,會做一息仔家事哩!
幾年過後,阿公因為破病過身,阿婆這一兩年來身體乜毋好,歸日看電視,當少出去過家寮,有一息仔艱苦這下開始食毋著阿婆做个筍干哩…但是分𠊎盡艱苦个係…摎阿婆乜無像細細个時節當有話講,可能係阿婆年紀較大哩,乜可能係𠊎大漢哩,阿婆毋知愛同𠊎講麼个。
這下去食喜酒,看著爌肉裡肚个筍干,就會想到細漢个時節去山項剁竹筍、在屋下切竹筍个回憶,雖然阿婆這下無做筍乾哩,但是頭擺美好个回憶,毋會因為這下食毋著,就毋係真實个事情,筍乾摎祖孫个感情,𠊎會封存在心肚項,係永遠會記得个回憶、味道。
這下看著還細漢个老弟 ,同該時个𠊎平大,阿婆个筍乾哪做得分佢毋見忒!
阿弟仔 ,阿姐來教你切竹筍好無?
最後更新日期:2015-08-14