第4屆桐花文學獎客語類小品文組佳作【䟘床】

「好䟘床哩!日頭曬屎朏吔,𠊎斯事做忒一大片哩喲!」打早,天正普普仔光,就聽著阿姆在該喔喔喊喊。記得頭擺還細該下,堵著放尞日,就會想愛韌床,搵到眠床項,想東想西,天文地理,加減發夢;無就同姊妹仔打南打北,哪個細倈仔生來異緣投、哪家个狗嫲降子哩…講兜有个無个,韌床實在係人生一大樂事。阿姆做佢喊,吾兜恁多姊妹還係耳(耳休)(耳休)仔,無停無動。阿姆喊个聲哨,就像放送頭傳過來:「這兜細猴仔,還毋䟘床,老古人講个:毋驚家裡窮,就驚日日睡到日頭紅,還講:早䟘三朝當一工,早䟘三年當一冬;煞煞好䟘吔,食飽朝愛去園項𢯭手做事,趕早較涼。」恁多姊妹高不將正䟘床。
等到出吔社會,上臺北食頭路,在外背贌屋仔歇,放尞日係無轉屋下,任在你看愛睡到幾晝,無人會逐你䟘床。上班該下,三不二時會同公司裡肚既經做人心臼个同事打嘴鼓;識聽佢兜道嘆目毋足,講麼个做人心臼愛當驚心,天吂光,就毋敢睡吔,耳角角仔緊聽灶下有出聲無?一聽著聲,就愛遽遽跋䟘起來,係無,驚怕家娘个面色毋好看。該時節,還係細阿妹仔个𠊎,毋知頭天,總係想厥兜仰恁衰過,換做𠊎正無插佢恁多。等到有一日自家嫁欸人,做人心臼吔,正深深感受著頭擺該兜同事个心情。正經就係恁樣,天吂光就醒吔,毋敢再過睡;一聽著灶下有聲,就遽遽下樓同世大人相借問。成下,家娘會講:無麼个事情,愛使恁早䟘,倒轉去睡啊!講係恁樣講,𠊎還係毋敢。這下想起來,頭擺仰恁乖,敢怕係早期對イ恩客家細妹仔「家頭教尾、田頭地尾、灶頭鑊尾、針頭線尾」个教育教出來个。
等到自家降欸細人仔,做阿姆吔,日時頭上班既經𤸁凹凹仔,暗晡頭還愛䟘床同嬰兒仔換尿裙仔、泡牛奶。有成時,睡到當落覺,嬰兒仔又噭無停,目珠𤸁到強強就睨(ne)目毋起,目𥉌𥉌仔䟘床,目摸目罅在該料理細人仔,試著實在還辛苦,想著膝頭就會出目汁,難怪老古人言會講:爺娘恩情大過天。
現下係工商業社會,講个係兩性平權,細妹人大體就有食頭路,較有自主權,有自家个想法。閒時節,各各有自家个頭路,無閒洎杈;係堵著放尞日,大體會睡到自然醒,睡到過晝缽𤊶乜毋怕。就算嫁欸人,家娘乜較無像頭擺高高在上,心臼同家娘个關係較像朋友,該種一聽著聲就愛遽遽跋䟘床个經驗也異少聽著吔,睡較晝乜無人敢喊你䟘床。平平係䟘床,無共樣个時代,無共樣个身份,心情摎經驗都差盡大碼哦!
最後更新日期:2015-08-14