第5屆桐花文學獎客語組新詩類首獎【造景藝術禾稈堆】

阿爸企在客家文化園區个展覽館
冷氣口流出北風,冬下頭
一隻禾稈堆恬恬坐在該
歸下晝了,阿爸還毋盼得行開
就像當年佢毋盼得,搬走
屋前屋背都係禾稈堆个老屋
該年政府開路開到屋面前
搬家前一日,阿爸在大禾埕縈禾稈
窿落灶空肚,煙囪笐就嘔出阿爸个心焦
該隻暗晡夜暖个水,洗在膚身分毋出燒抑冷
幾年之後禾稈堆生出大樓小樓
一棧又一棧,比當年屋背拔高个桂竹還較多節

一隻禾稈堆,坐在展覽館恬索索
幾點鐘過去咧,仰般等毋着屋簷鳥飛過來
旁脣兩張凳頭也等毋着上屋下家
阿爸轉毋到頭擺个這下
佢還係一直企在禾稈堆前發琢呆
佢還在該等,等有一日做得轉去田中央,紮禾稈
做人,再過做一擺耕田人

一隻禾稈堆,這隻時代安作造景藝術
阿爸也企在展覽館變成刻像,完全無停動
臨暗仔展覽館愛關門咧,阿爸正回神大喊
佢愛轉去禾稈堆該隻年代


 

最後更新日期:2015-10-16