第5屆桐花文學獎客語組新詩類優等獎【轉秋】

涼沁沁个風吹等過來
山分雨染做青色 像該藍衫染缸分人蹬翻忒共樣
香醇醉人个老唱盤聲 變做會跳舞个音符盡放
散在花樹下迴盪
隻隻毋安份个烏白豆芽音符 對四面八方跳上跌落
唱等阿姨愛聽个歌仔
脣頭歸排仔桂花 淰淰个花香味緒也走等出來
行過門來遶尞毋肯走 像同人扼手相借問共樣
揇等阿姨个新屋仔
 
流流漂漂个雲 毋知好敗勢
跈等撩鳥个秋風 在蓬白个雲層頂高打潑賴
無閒洎杈个心思也魯夫起來 齣齣个往事
兩手嗄 毋核 分佢飛上藍天頂高
像做電影共樣
細細仔時節个舊事

分阿姨做妹仔 喊佢阿姆个身影
恬恬仔 笑微微仔探出頭來
浮上滿坪落英繽紛个地泥面頂
啊!阿姨个笑容最靚!
 
渟來一杯釅茶 坐在摎阿姨新做好个風水頭前
毋管 兜仰般目汁闌干
阿姨好比仙女共樣 看等山分雨染做青色
像該藍衫染缸分人蹬翻忒共樣个風景
轉秋哩!


 

最後更新日期:2015-10-16