第5屆桐花文學獎客語組新詩類佳作【阿婆个癌症還吂天光】

故鄉客家庄有一坵田,係祖田
起風个暗夜天頂無月光
菜蟲在深夜偷偷圍食阿婆種个菜
該逐皮菜葉仔,都係佢毋願讓步个疆土
阿婆在烏天暗地擎一支手電筒,跍在菜園捉蟲
轉屋後還吂天光
 
阿婆心肚也有一坵田,係心地
半夜嗽毋停,一聲聲个砲彈害佢敨毋過氣來
一種「菌」个細蟲,在烏夜中圍攻佢个肺
該兩皮肺葉仔係阿婆節節敗退个版圖
逐隻暗晡佢在大眠床頂忍等病痛,翻過來又翻過去
等毋到天光

故鄉个祖田,阿婆个心地
在阿婆發病个時節慢慢相接連
佢拖等緊來緊重个病在田中央弓身種菜,滴落汗汁
該菜葉个疆土,該肺葉个版圖
係阿婆晚年个雙重選選題
佢勾選為𠊎行前抵抗,也勾選為𠊎讓步
 
如今𠊎了解自家係一條大菜蟲
食忒祖田歸園个菜,食忒阿婆心地个兩皮葉仔
半夜發夢忽然間著驚坐起來
在病床前,阿婆發个癌症還吂天光

 

最後更新日期:2015-10-27