第5屆桐花文學獎客語組新詩類佳作【老兵牯】

打摺个面容有歲月留下來个印跡
背痀痀个身影係難說个辛酸
醹醹个鄉音講毋出想屋个心情
海,阻隔轉老屋庄个路
日落个黃昏剪下西片天頂个紅霞
鬥毋齊爺娘个面容摎老家鄉个山排
 
點一支新樂園,打着露水行過黃泥崎
孤栖一儕人坐在恬索索个老雜貨店
透夜做伴个昏暗燈盞、零星酒摎番豆
嘴硬無講个,打摺个額頭早就偷偷仔
翻盡跑馬走浪个思念,就算
三暗晡乜說毋盡心肝頭个憂愁

毋知,酒醉个半夜思鄉个海水
識恬恬仔蔭溼佢个枕頭無?
長年月久後,零星酒只會食忒時間
食忒長遠个記憶摎挲毋盡荒煙漫草个心田
嗄,無法度添補這份缺角个愛
最後伸下來个,只有發夢時个相堵
 
老兵牯个心聲麼人知?心肚關起一扇門
行透這條街路也行盡人生个辛酸路
消失在深山荒林,帶等佢淰淰个悲傷
跌落無人看着个山園,無再䟘起來
任眾人聲聲叫喚,還係恬恬仔睡忒
最後伸下來个,只有一坏黃泥
轉屋,摎半夜發夢時个相堵────

最後更新日期:2015-10-27