第5屆桐花文學獎客語組散文類佳作【叔婆愛磨粄】

阿姆喊「阿來叔姆」,イ恩俚做細孲仔个愛喊「叔婆」,𠊎在馬里庄就有六對叔公、叔婆愛喊,這个「阿來叔婆」係最輒常愛喊个一位叔婆,佢毋係イ恩俚共房份个叔婆,佢係第四房个叔婆,「阿來叔婆」就戴對門,輒常來イ恩俚屋家磨粄,從細到大,就知佢愛來𠊎屋家磨粄、愛摎𠊎阿姆講山前舊事。

愛磨粄摎愛講「山前舊事」當然毋係叔婆一儕定定,特別愛講著這个叔婆,係因為見擺佢過𠊎屋家磨粄,就就定著會講著「頭過山前,イ恩俚吂過來花蓮港這片个時節」、「山前八月初一敬阿公婆个時節」,イ恩俚細輩就當記得這幾句,一直到這下。叔婆食到九十二歲正過身,雖然講𠊎無轉馬里庄送叔婆,佢矮細矮細、背駝駝仔个身影,年節定著來𠊎屋家磨粄、摎阿姆講「山前舊事」个光景,一直就毋會添放忒。

後山縱谷个人一講着愛轉桃竹苗各大細庄个老屋,就有盡多事情愛先安排好勢,正有法度走遠,愛轉山前一擺確實就無恁該。係講山前有搭信過來,抑係有電報過來通知山前親戚鄰舍个婚喪喜慶,堵着有閒時節正轉得,堵着當緊工个時節就轉毋得。平常一講着山前,叔婆就盡有興頭,長透講着个就係過去做細孲仔時節个事情,叔婆講个「山前」單淨係新屋摎伯公崗定定,佢講个舊事也單淨係二十歲前个范姜屋人事,摎短短三年埔頂庄黃屋个人事。

叔婆在新屋庄出世,佢爺哀就在新屋庄開雜貨店,到二十歲嫁分黃屋第四房个阿來叔公,三年定定,雙雙就跈等爺哀,也就係叔婆个家官家娘徙來後山个馬里庄,這兜事情還係阿叔婆講分阿姆聽个,𠊎一直到二十零歲正聽得識。叔公生着已高大,叔婆矮細矮細仔,叔婆一直就無降着有細孲仔,摎細姑仔分一个細倈仔來做倈仔,𠊎愛喊佢阿興叔,又摎外庄人分一个細阿妹仔來做妹仔,𠊎愛喊佢阿玉姑,叔公、叔婆一家人就戴イ恩俚對門,在馬里庄這兩家黃屋人就恁樣耕田耕圃過日。

馬里庄个人大部分係客人,摎山前个客人庄共樣,過年、正月半、清明、五月節、七月半、十月半,都愛拜喏、拜伯公、敬阿公婆,毋單淨愛㓾雞捋鴨,還要舂粢打粄來準備牲禮,見擺堵着節日,戴對門个阿叔婆就會過家來𠊎屋家磨粄。就像山前樣仔,年節愛磨粄、打粄,阿姆總係會按算好勢,屋家事先做定貼好來,愛準備磨粄,叔婆定著會一儕人擐等一錫桶浸好个糯米來イ恩俚屋家磨粄,因為佢屋家無治磨粄用个石磨仔,知
兜字墨个叔公也從來就毋識摎叔婆過來共下磨粄,佢做佢自家去街路尋人尞涼打嘴鼓。イ恩俚屋家大細多,愛磨个糯米也多,叔婆屋家人無恁多,當然愛磨个米無恁多,見擺就先磨叔婆个,イ恩俚細孲仔總係有一、兩儕來添手磨粄。

一個三角形个樹架仔橫吊在屋樑下,三角尖有鐵鉤仔插到磨石邊个空仔,イ恩俚手抓等橫槓,就恁樣來來去去拉送,米漿就從石磨仔底下流入外脣个圓溝仔,過從一個出口流落布袋肚。當磨粄个時節,叔婆摎阿姆輪流坐在磨石脣个高凳頭,用杓仔舀糯米水,米水愛看好勢磨架仔轉到哪,就遽遽倒到磨石頂个空仔,還要看流出來个米漿變少正倒落去,就恁樣形,拉送磨架个細孲仔、舀米水个叔婆、阿姆,三子叔婆盡調和个磨粄動作,盡像一套設計盡好勢个磨粄機器。

叔婆个部分磨好咧,就接等磨イ恩俚屋家个,叔婆屋家就幾儕人定定,一個麵粉袋个米漿就做得咧,イ恩俚屋家就愛兩、三袋。見擺當磨粄个時節,叔婆總係緊舀米水,緊講山前舊事,又講又笑,換阿姆舀米水个時節,叔婆在旁脣共樣會緊講,叔婆講山前个話語和等轉動个石磨仔,發出「沙嘎─唧嘎─」个聲音,盡像和弦索唸謠唱山歌,恁調和、恁順序。

背尾,因為街路有米店用機器摎人磨粄,人家屋就較無人用石磨仔磨粄咧,毋過,在幾個定著愛敬阿公婆个年節,叔婆還係會來共下磨粄,該下仔,𠊎讀高中咧,在屋家有堵着愛磨粄,𠊎也定著會添手,正真經看出來叔婆盡愛緊磨粄緊摎𠊎阿姆講山前舊事,講到又詳細又清楚,有个講有三、四遍樣仔咧,記得佢講:

「阿祿嫂係若大房个呀!識有半年摎佢兩公婆共灶食飯,該央時若阿來叔到員山庄做事,轉夜就轉到阿祿嫂屋家。𠊎一儕人在祿嫂屋家,又係正嫁過來黃屋。」這一段仔古,叔婆特別愛講。

「嗯,係阿祿叔姆喔?𠊎乜識在佢屋家共灶食飯呀!」阿姆總係話無多,又定著愛應聲,叔婆係長輩呀!

「阿祿嫂盡愛親,對黃屋人麼人都好,也盡會惜這兜叔伯兄弟姊嫂,見人就親,又毋會摎人計較。」成時一到食飽晝,無論熱天抑係寒天,叔婆一看着阿姆無出門,又會過來尋阿姆打嘴鼓,一落到禾埕就會喊:

「阿茶,無出門喔?」

「阿茶,無去菜園種菜、摘菜喔?」叔婆喊阿姆「阿茶」,阿姆會遽遽兜矮凳仔招呼佢坐。記得盡像逐年个寒天,叔婆就會講着:「山前這央時風合水,冷到會鑽骨樣仔。」有幾擺入秋落水毛个時節,聽着阿姆講:

「八月秋風漸漸來,一擺水一擺冷喔!イ恩俚這位摎山前無相像,有較恬風。」

「恁堵好,𠊎外家頭摎イ恩俚埔頂黃屋都在八月初一共日敬阿公婆,這日還毋係麼个年節。」阿叔婆接等講。過來馬里庄這片,イ恩俚八月初一無敬阿公婆,原旦就愛留來轉山前公廳摎黃屋人大家共下敬个呀!

成時一到臨暗仔,阿姆從屋背摘菜轉來屋面前,坐等擇菜个時節,叔婆就一儕人行過來,自家兜凳頭就坐在阿姆旁脣,從種菜、摘菜會一下仔講到山前「做中元」个情景,從范姜屋辦桌講到埔頂黃屋辦桌。

「做細妹人个時節,做中元分人請,衫服著靚靚,有細倈仔會緊捉人看。」平常時節,盡少看着叔婆去街路尋人講話,一來𠊎屋家,就摎阿姆講這兜山前舊事,一講就講毋會煞,講着見擺看着𠊎阿姆在旁脣啄目睡。

記得盡細个時節,山前阿婆過身,阿爸、阿姆帶大哥轉山前,屋家無大人,幾个細孲仔掌屋,叔公叔婆就過來看顧イ恩俚,煮飯分イ恩俚食,普普仔記得叔婆講:

「你這兜細孲仔仰會知?過來這片,盡艱辛个係『轉山前』,山前該片也有好壞事愛行呀!」

阿爸阿姆從山前轉來,叔婆一聽着聲,就會一儕人過家來問這問該。在𠊎个印象裡肚,阿叔婆像從來就毋識轉山前,叔公像毋識帶叔婆轉去樣仔,毋過當然無像阿爸阿姆恁輒轉,佢兜四房个人原本就無多,又全部都徙過後山來,イ恩俚大房个人數乜有較多還戴在埔頂祖居地个四方庄頭,遷徙過來後山个就吾爺哀兩儕人定定。

叔婆知𠊎在臺北食頭路戴臺北,年節定著會轉埔頂敬阿公婆、掛紙拜祖塔,一看到𠊎轉馬里庄,過家去看叔公叔婆个時節,叔婆又會摎𠊎問東問西,講:「阿奎哥,喔,若阿伯啦!有看着佢無?」「第四房个銀妹姐有帶佢个倈仔來無?」「三房阿坤叔戴尾庄,你敢有看到佢?」

該幾年轉馬里庄,叔婆同阿興叔搬到街路戴,因為路頭較遠,就無過擐糯米來𠊎屋家磨粄,𠊎成時會去看叔婆摎阿興叔,叔婆个背有較痀咧,毋過一看到𠊎,佢个精神就來,又開始講:

「頭擺山前,𠊎還做細妹仔時節……。」

一直到叔婆做九十一生日,𠊎特別轉馬里庄去食佢个大生日酒,𠊎要用盡大聲來摎佢講話,佢還係共樣細細聲仔緊唸緊講:

「喔!𠊎有聽人講,公廳起過,起到盡派頭!頭過還係老紅瓦屋个時節,同若叔公去過兩擺,吂拜着第三擺,若叔公就渡𠊎過這片馬里庄來咧呀!」

「叔婆,公廳當起个時節,安門上樑、祖公祖婆登龕安座,阿祿叔婆有去公廳,該下佢就有一百歲咧呀!」「恁樣喔,還有福氣,食到一百咧喔。」看阿叔婆緊講聲緊細,後背嘎聽毋清楚佢講麼个,就單淨看着佢个嘴緊動緊唸。一生人無過轉山前个叔婆,這係最尾一段摎𠊎講着山前人事,就𠊎所知,叔婆食到老一直就毋識再轉到佢最愛講个「山前」。



 

最後更新日期:2015-10-30